Угостителите во Скопје ќе можат да го фрлаат сметот до 1 часот по полноќ

Рестораните, кафулињата и другите угостителски објекти во Скопје ќе имаат посебен временски термин за одлагање на отпадот, кој ќе биде дозволено да се фрла до 1 часот по полноќ.

— реклама —

Измената е усвоена на последната седница на Советот на Град Скопје, по иницијатива на градоначалникот Орце Ѓорѓиевски, како дел од измените на Одлуката за комунален ред.

Од Градот објаснуваат дека посебниот термин е утврден поради работното време на угостителските објекти, како и видот и количината на отпад што го создаваат. Целта е да се намали оптоварувањето на контејнерите наменети за домаќинствата, кои често се преполнуваат со отпад од рестораните и кафулињата.

— реклама —

ЈП „Комунална хигиена“ веќе работи на склучување договори со угостителите, кои ќе добиваат сопствени контејнери. За собирањето и подигнувањето на отпадот ќе плаќаат според ценовникот на претпријатието.

— реклама —

Подобрувањето на системот за управување со отпадот е поврзано и со набавката на 3.300 нови контејнери, со кои се заменуваат оштетените и дотраените садови и се зголемува бројот на места за правилно одлагање на сметот. Во комбинација со специјализираните комунални возила, тие треба да придонесат за поефикасно собирање на отпадот и подобра јавна хигиена.

Претходно, на 1 април беше донесена одлука со која угостителските објекти, канцелариите, пазарите и трговските субјекти се задолжени да склучат договор со ЈП „Комунална хигиена“ за собирање и транспорт на отпадот. Предвидена е и обврска за селектирање на отпадот на местото каде што се создава, во посебни садови што не се наменети за домаќинствата.

— реклама —

За станбените објекти, од ноември минатата година важи правилото сметот да се одлага од 6 до 22 часот. За непочитување на оваа одредба е предвидена казна од 50 евра, додека со најновите измени се утврдува посебен термин за угостителските објекти.