Украинскиот претседател Володимир Зеленски се соочува со проблем да пронајде нов амбасадор во САД, бидејќи потенцијалните кандидати не се подготвени да ја преземат, како што се оценува, една од најтешките дипломатски позиции во клучен момент за Украина.
Според „Политико“, Зеленски има тешкотии да најде кандидат со доволно политичко влијание за да го претставува Киев пред администрацијата на американскиот претседател Доналд Трамп. Претходната амбасадорка Олга Стефанишина беше разрешена на 3 август поради најавени обвиненија за проневера.
Зеленски наводно се обидел функцијата да ѝ ја понуди на поранешната премиерка Јулија Свириденко, но таа ја одбила понудата. Самиот Зеленски на прес-конференција на крајот на јули потврди дека сметал на Свириденко за позицијата.
„Не е тајна дека сметав на Јулија Свириденко и ѝ понудив да биде амбасадорка во САД“, изјави Зеленски, додавајќи дека бара кандидат со највисоки можни квалификации – лице на ниво на заменик-премиер, министер или премиер.
Но, според соговорници на „Политико“, и други потенцијални кандидати не се заинтересирани да ја преземат функцијата. Причината, како што се наведува, е тежината на работата во Вашингтон и потребата амбасадорот да има директна доверба и пристап до Зеленски.
Празното амбасадорско место доаѓа во особено чувствителен момент за Киев. САД остануваат клучен партнер за украинската воена способност, а идниот амбасадор би требало да се справува со администрацијата на Трамп, која повеќепати го менувала пристапот кон воената помош за Украина и кон прашањето за завршување на војната.
Киев во моментов се обидува да добие американска лиценца за производство на системи за противвоздушна одбрана „Патриот“, додека Украина се подготвува за уште една зима со руски напади врз енергетската и цивилната инфраструктура.
Во исто време, постојат сигнали дека Вашингтон би можел повторно да се обиде да ги придвижи мировните преговори. Поради тоа, амбасадорот во Вашингтон би имал значајна улога не само во разговорите за оружје и воена поддршка, туку и во односите со американскиот Конгрес и евентуалните мировни иницијативи.
