Повеќе региони во Украина останаа без електрична енергија по новите напади врз енергетските објекти, соопшти компанијата „Укренерго“.
Според операторот на електроенергетскиот систем, прекини во снабдувањето со струја се регистрирани во Черниговската, Дњепропетровската, Сумската, Харковската, Одеската и Хмелничката област.
Од „Укренерго“ наведоа дека, каде што безбедносните услови го дозволуваат тоа, веќе започнале итни работи за обновување на мрежата и стабилизирање на снабдувањето.
Компанијата соопшти и дека утринската потрошувачка на електрична енергија била пониска во споредба со претходниот ден, што се поврзува со временските услови и зголеменото производство од соларните електрани.
До граѓаните беше упатен апел потрошувачката на електрична енергија да ја прилагодат на периодите кога соларните капацитети произведуваат најмногу струја, како и да избегнуваат истовремено користење повеќе уреди со голема потрошувачка во вечерните часови за да се намали оптоварувањето на системот.
„Укренерго“ претходно соопшти дека и во изминатите денови биле изведени масовни напади врз енергетската инфраструктура, кои предизвикале прекини во снабдувањето во повеќе региони, вклучително и во Киев.
