Украинската влада за првпат од почетокот на руската инвазија во 2022 година одобри механизам што ќе овозможи извоз на домашно произведено оружје. Одлуката треба да им овозможи на одбранбените компании полесен пристап до странските пазари, дополнителни инвестиции и долгорочен развој на индустријата.
Министерот за одбрана Михајло Федоров соопшти дека е воспоставена јасна и транспарентна постапка, која ги дефинира правилата за државата, производителите и меѓународните партнери.
Според него, новиот модел ќе им овозможи на украинските компании да го зголемат производството, да воспостават соработка со странски партнери и да привлечат нови вложувања, но истовремено ќе се гарантира дека потребите на украинските вооружени сили ќе имаат апсолутен приоритет.
Извозот на оружје и воена технологија ќе биде дозволен само кон земјите што учествуваат во иницијативата „Drone Deal“, која досега ја поддржаа 27 држави, меѓу кои и 15 членки на НАТО.
Федоров најави дека постапката за добивање дозволи ќе биде целосно дигитализирана и поедноставена, со цел украинските производители полесно да ги пласираат своите производи на странските пазари.
Новите правила, сепак, предвидуваат строги ограничувања. Нема да биде дозволен пренос на права од интелектуална сопственост, а понатамошен реизвоз на украинско оружје ќе биде можен само со писмена согласност од Киев.
Во изминатите години во Украина се појавија голем број компании што развиваат современа воена технологија, но досега нивниот извоз беше забранет. Производителите тврдат дека денес можат да произведат значително повеќе оружје отколку што државата може да набави, поради што бараа отворање на странските пазари.
Според проценките на Киевската школа за економија, високотехнолошкиот сегмент на украинската одбранбена индустрија во 2025 година достигнал вредност од околу 6,8 милијарди долари, а властите очекуваат новите мерки дополнително да го поттикнат развојот на секторот, без да се загрози снабдувањето на украинската армија.
