Украина разви сопствена лизгачка бомба: „Наскоро ќе ги погодува руските цели“

Украина разви сопствена лизгачка бомба, која е целосно производ на украински инженери и е наменета за напади врз утврдени позиции, командни центри и други цели длабоко зад фронтот.

Ова го изјави украинскиот министер за дигитална трансформација, Михајло Федоров.

— реклама —

„Ова не е копија на западни или советски решенија, туку оригинален производ на украинските инженери“, рече Федоров.

Лизгачките бомби се класични авионски бомби опремени со крилја и системи за наведување, што им овозможува по лансирањето да прелетаат голема далечина до целта.

— реклама —

Украина досега користеше западни JDAM-комплети за претворање на класични бомби во лизгачки, додека Русија од 2023 година масовно користи модернизирани советски FAB-бомби со системи за наведување.

— реклама —

Руските сили користат лизгачки бомби од 250, 500 и 1.000 килограми, а Москва воведе и FAB-3000 со боева глава од 3.000 килограми.

Ова оружје стана сериозна закана за украинските позиции бидејќи може да се лансира надвор од дострелот на дел од противвоздушната одбрана, а притоа носи огромен експлозивен товар.

Федоров порача дека новото украинско оружје е дел од пошироките напори Киев да изгради сопствена високотехнолошка воена индустрија.

„Наскоро украинските лизгачки бомби ќе ги погодуваат непријателските цели“, изјави тој.