Украина со масовен напад со дронови врз Русија и покрај предупредувањата на Трамп

Украина извршила еден од најголемите напади со беспилотни летала врз Русија годинава, при што бил погоден нафтен терминал во Санкт Петербург. Нападот доаѓа во период на зголемени тензии меѓу Киев и Вашингтон, откако американскиот претседател Доналд Трамп побара прекин на нападите врз руската енергетска инфраструктура.

Руското Министерство за одбрана соопшти дека во текот на ноќта биле соборени 1.015 украински дронови над различни делови на земјата. Според руските власти, меѓу целите бил и нафтениот терминал во Санкт Петербург, со годишен капацитет за преработка од 12,5 милиони тони нафта. Украинската компанија „Фајр поинт“, која произведува дронови употребени во нападот, потврдила дека на подрачјето на терминалот избувнал пожар.

— реклама —

Нападнати биле и логистички центри на дистрибутивната компанија „Озон“, како и центар за податоци на социјалната мрежа „ВКонтакте“. Локалните власти соопштиле дека едно лице загинало, а петмина биле повредени. Оштетени биле и станбени згради.

Во меѓувреме, украинскиот претседател Володимир Зеленски предупреди дека евентуалното застанување на САД на страната на Русија би било „историска грешка“. Во интервју за емисијата „Мит д прес“ на телевизијата Ен-би-си, тој оцени дека американското ублажување на економските санкции кон Москва претставува дополнителна поддршка за руската агресија.

— реклама —

Зеленски потврди дека во неделата разговарал со американскиот пратеник Стив Виткоф и со Џаред Кушнер, зет на Трамп. Тој рече дека комуникацијата продолжува со цел да се постигне мир и изрази надеж дека американскиот претседател ќе го промени својот став кон рускиот претседател Владимир Путин.

— реклама —

Тензиите се зголемија откако Трамп ги нарече украинските напади врз руските рафинерии „срамота“. Иако пред една недела изјави дека Русија и Украина се согласиле да ги прекинат нападите врз енергетската инфраструктура, ниту Киев ниту Москва не потврдија дека постои таков договор. Украина накратко ги запрела нападите, но потоа продолжила, додека, според украинските власти, Русија не престанала со нападите врз украинските енергетски постројки и градови.

Зеленски соопшти дека во руските ракетни напади и напади со дронови во Украина во последните 24 часа загинале 11 лица, а речиси 50 биле повредени. Меѓу целите биле и енергетски објекти во областа Одеса. Тој тврди дека од најавата за енергетско примирје Русија 76 пати намерно го нападнала украинскиот енергетски и нафтен сектор.

Украинскиот претседател се осврна и на воената соработка со САД, наведувајќи дека пристапот на украинската војска до системот „Старлинк“ за насочување дронови и натаму е ограничен. Тој рече и дека американската страна три дена ја прекинала размената на разузнавачки податоци за време на руски напади со балистички ракети, но дека соработката во меѓувреме била обновена. Администрацијата на Трамп, пак, негира дека наредила ограничување на брзината на украинските дронови.

На прашањето дали го смета Трамп за сојузник на Украина, Зеленски одговори: „Се надевам“.