Украинската Служба за безбедност на Украина (СБУ) соопшти дека по минатомесечниот напад врз Черниговската област биле пронајдени руски ракети со боеви глави што содржат осиромашен ураниум.
Според СБУ, зголемено ниво на радијација било откриено кај неексплодирана ракета воздух-воздух Р-60, поставена на модифициран дрон „Геран-2“, кој наводно бил користен за напади врз украински хеликоптери и авиони.
Украинските власти тврдат дека извор на радијацијата се изотопите ураниум-235 и ураниум-238, кои се дел од осиромашениот ураниум – нуспроизвод при збогатување на ураниум.
Осиромашениот ураниум е познат по својата висока густина и често се користи во муниција за пробивање оклоп.
Од СБУ наведуваат дека, заедно со припадници на службите за вонредни состојби и украинската армија, ја обезбедиле боевата глава и ја транспортирале во складиште за радиоактивен отпад.
Било измерено гама-зрачење од 12 микросиверти на час, што, според украинските власти, е значително над природното ниво и може да претставува ризик за здравјето.
СБУ ги повика граѓаните да бидат внимателни при пронаоѓање остатоци од дронови, ракети или друга муниција.
„Оштетената или изгорена муниција претставува најголема опасност бидејќи може да ослободува радиоактивна прашина штетна за луѓето и животната средина“, соопшти украинската служба.
Украинските истражни органи водат предистражна постапка за можни воени злосторства.
