Украинската армија соопшти дека оператори на дронови од Третиот полк за специјални операции воспоставиле воздушна контрола над дел од рускиот копнен коридор за снабдување што води кон окупираниот Крим.
Според украинската војска, дроновите сега можат да дејствуваат врз руска воена техника и логистички цели долж рутата Мелитопол – Чонгар во јужна Украина, која претставува една од клучните врски со полуостровот што Русија го анектираше во 2014 година.
Од полкот соопштија дека со ова дополнително се отежнува руската воена логистика и снабдувањето со гориво кон Крим.
„Ова е само почеток. Следува уште“, порачаа од украинската војска, објавувајќи видео за кое тврдат дека прикажува напади со дронови врз руски цели.
Независна потврда на снимките засега нема.
Во последните месеци Украина значително ги прошири своите способности за напади со дронови на средно растојание, при што редовно изведува удари врз руски воени цели на оддалеченост од десетици, па и стотици километри зад линијата на фронтот.
Особено на удар се логистичките правци и складиштата за гориво во окупираните делови на јужна Украина, кои ја сочинуваат таканаречената копнена врска меѓу Русија и Крим.
Претходно украинските сили извршија напади врз железничката инфраструктура што води кон Крим, а украинската бригада „Азов“ објави снимки од удари врз руски цели во окупираните градови Доњецк и Мариупол.
Според украински извори, повеќе од педесет напади биле изведени врз руски цели долж важни транспортни правци во окупираните територии, вклучувајќи ја и трасата Р-280, позната како „Новорусија“, која го поврзува Ростов на Дон со окупираниот Крим.
