Украинските одбранбени сили, со уништување на патен мост во близина на селото Роздолне, ја прекинале една од клучните руски рути за снабдување на окупираниот Крим, пренесуваат украински медиуми.
Според информациите, дел од урнатиот мост паднал директно врз железничката пруга што минува под него, поради што целосно е запрен железничкиот сообраќај на единствената линија што ја поврзува руската Краснодарска област со централниот и западниот дел на Крим.
Украинскиот медиум „United Media“, повикувајќи се на каналот „Кримски ветер“ на Телеграм, наведува дека мостот бил погоден во ноќта меѓу 18 и 19 јуни, кога бил нападнат и блискиот железнички мост над Севернокримскиот канал.
Неколку дена подоцна следувале нови напади, при што железничкиот мост претрпел дополнителни оштетувања, а сообраќајот на тој дел од пругата бил целосно прекинат.
Според истите извори, руските власти испратиле специјални возови и механизација за санација на оштетувањата, но украинските беспилотни летала повторно ја нападнале локацијата и ја уништиле опремата за поправка.
Поради оштетувањата, прекината е железничката врска кон клучните градови Симферопол и Севастопол, кои Русија ги користи за транспорт на воена опрема и логистичка поддршка.
Руските окупациски власти соопштиле дека патничките и товарните возови засега ќе сообраќаат само до станицата Керч-Јужна – Нов парк, сè додека оштетената делница не биде повторно оспособена.
