Украинската армија: Експлодираниот објект кај Киев не е наш

Украинскиот Генералштаб соопшти дека објектот во градот Вишневе, во близина на Киев, каде што по вчерашниот руски напад дојде до серија секундарни експлозии, не е во сопственост ниту под надлежност на украинските вооружени сили.

Портпаролот на Генералштабот, Дмитро Лиховиј, изјави дека во сила е наредбата со која е забрането складирање муниција и други слични материјали во близина на населени места и цивилни објекти.

— реклама —

„Украинските вооружени сили доследно се грижат за безбедноста на цивилното население“, порача Лиховиј, изразувајќи сочувство до жртвите од рускиот напад.

Во ноќта меѓу неделата и понеделникот, Русија изврши масовен комбиниран напад врз Украина со беспилотни летала и ракети лансирани од воздух, копно и море.

— реклама —

Според украинската противвоздушна одбрана, биле соборени 363 од вкупно 419 воздушни цели, но 29 балистички ракети и 18 дронови погодиле 34 различни локации.

— реклама —

Поради опасност од нови експлозии, од Вишневе биле евакуирани речиси 500 жители.

Украинскиот претседател Володимир Зеленски побара од безбедносните и разузнавачките служби детално да утврдат што се случило во Вишневе.

Според премиерката Јулија Свириденко, станува збор за најголемото уништување на станбени населби од почетокот на руската инвазија, при што биле оштетени околу 13 хектари станбена површина.

Во нападот врз Киевската област загинале девет лица, а 58 се повредени.