Украинските сили соопштија дека во ноќта меѓу 2 и 3 јуни извршиле напад врз руската корвета „Бојкиј“ во поморската база Кронштат, во близина на Санкт Петербург. Според украинските власти, нападот бил дел од поширока операција во која бил погоден и нафтен терминал во регионот.
Одговорноста за акцијата ја презедоа украинските Сили за беспилотни системи и Службата за безбедност на Украина, кои наведоа дека проценката на причинетата штета сè уште е во тек.
„Бојкиј“ е корвета од класата „Стерегушчи“ и е дел од руската Балтичка флота. Бродот е наменет за повеќенаменски операции и е вооружен со противбродски ракети Х-35У, кои Русија ги користеше и во текот на војната против Украина.
Нападот се случил во базата Кронштат, која се наоѓа на островот Котлин во Финскиот Залив и важи за едно од најважните упоришта на руската Балтичка флота. Базата има значајна стратешка улога како логистички центар и како дел од одбраната на поморските приоди кон Санкт Петербург.
Украинскиот претседател Володимир Зеленски потврди дека во рамките на ноќните операции биле погодени исклучиво воени цели во Кронштат, како и други објекти во Русија.
Од украинските сили тврдат дека корветата „Бојкиј“ била ангажирана во обезбедување на танкери од таканаречената руска „флота во сенка“, мрежа од бродови кои Москва наводно ги користи за извоз на нафта и покрај западните санкции.
Доколку се потврди погодокот, ова би бил еден од најдлабоките украински напади врз цели на Балтичката флота, на повеќе од илјада километри од украинската граница. Руските власти засега не објавија официјални информации за евентуалната штета на бродот.
