Украински беспилотни летала во текот на ноќта погодиле танкер во руското пристаниште Таганрог и складиште за нафта во градот Армавир, соопштија властите во Ростовската и Краснодарската област на југот на Русија.
Гувернерот на Ростовската област, Јуриј Сљусар, објави дека пожарите што избувнале на танкерот и во пристаништето во Таганрог биле изгаснати, при што не е регистрирано излевање на нафта. Според неговите информации, две лица се повредени во нападот.
Градоначалничката на Таганрог, Светлана Камбулова, соопшти дека вонредната состојба во градот, која била воведена на 27 мај, е продолжена.
Во меѓувреме, властите во Армавир, град со околу 185.000 жители во Краснодарската област, информираа дека пожарот во нафтеното складиште во индустриската зона е ставен под контрола и дека нема повредени лица.
Според Сљусар, руската противвоздушна одбрана соборила речиси 50 дронови над Ростовската област. Напади биле регистрирани на повеќе локации во регионот, кој граничи со украинскиот Донбас, каде што се водат најинтензивните борби меѓу руските и украинските сили.
Руските власти наведуваат дека надвор од Таганрог е предизвикана само помала материјална штета. Од украинска страна засега нема официјален коментар за нападите.
