Украински министер: Крим наскоро би можел да се претвори во остров за Русите

Украинскиот министер за одбрана Иван Федоров изјави дека Украина успешно спроведува стратегија за изолирање на Крим преку интензивни напади со беспилотни летала, оценувајќи дека тоа би можело значително да ја промени состојбата на фронтот.

„Се случува изолација на Крим со дронови и во блиска иднина изгледа дека Крим ќе се претвори во остров, што може да доведе до многу неочекувани последици за Русите“, изјави Федоров.

— реклама —

Според него, руските сили на окупираниот полуостров се соочуваат со сè поголеми логистички проблеми.

— реклама —

Украинските сили во последните недели ги засилија нападите врз клучните руски линии за снабдување. Командантот на украинските сили за беспилотни системи, Роберт Бровди, изјави дека сообраќајот на автопатот „Новоросија“, една од главните руски рути кон Крим, е намален за повеќе од две третини.

„Во рок од еден месец Украина би можела целосно да ја контролира таа сообраќајница. Ќе го изолираме Крим“, изјави Бровди.

— реклама —

Тој тврди дека украинските дронови во изминатата година значително ги зголемиле своите операции, а според украинските податоци, тие се одговорни за околу една третина од руските загуби во тој период.

— реклама —

Во меѓувреме, рускиот претседател Владимир Путин призна дека украинските напади со дронови предизвикуваат штета, иако оцени дека тие засега не претставуваат закана за руската економија.

И покрај тврдењата на Киев, воените аналитичари предупредуваат дека за целосно потиснување на руските сили од Крим, покрај воздушните и дронските операции, би била потребна и голема копнена офанзива.