Украинските напади врз руските нафтни рафинерии предизвикаа сериозна криза со горивото во Русија и ја разнишаа довербата на граѓаните во способноста на Кремљ да ги обезбеди нивните основни потреби, оценува францускиот весник „Ле Монд“.
Според анализата, со нападите врз енергетската инфраструктура Украина го нарушила неформалниот општествен договор меѓу руските власти и населението, според кој режимот обезбедува стабилност и економска сигурност во замена за ограничување на граѓанските слободи.
Весникот наведува дека во Москва, Санкт Петербург, но и во оддалечените сибирски региони, сè повеќе граѓани ја доведуваат во прашање способноста на државата да обезбеди редовно снабдување со гориво. Во повеќе градови се формираат долги редици пред бензинските пумпи, цените пораснаа, а нелегалната продажба на гориво е во пораст.
Економистот Никола Кулбака од Европскиот хуманистички универзитет изјави за „Ле Монд“ дека нападите ја откриле ранливоста на внатрешната логистика во Русија и дека увозот на гориво, вклучително и од Индија, не може брзо да го реши проблемот.
Андреј Јаковљев од Слободниот универзитет во Берлин смета дека кризата дополнително се продлабочува бидејќи населението нема доверба во официјалните информации. Според него, властите ги прикриваат размерите на нападите, а истовремено ги одржуваат ниските цени на горивото, што ја зголемува побарувачката и создава недостиг.
„Како резултат на тоа, кризата само се влошува“, оценува Јаковљев.
„Ле Монд“ наведува и дека руската економија сè повеќе ги чувствува последиците од војната. Според Гели Симола, водечка економистка во Институтот за економии во развој при Банката на Финска, економскиот раст во Русија годинава е забавен, а буџетскиот дефицит значително се зголемил.
Иако непосредна финансиска криза не се очекува, Симола смета дека Русија е принудена да носи сè поризични економски одлуки за да продолжи со финансирањето на воените операции.
Весникот потсетува и на неодамнешните анкети, според кои довербата во рускиот претседател Владимир Путин е во опаѓање, а кризата со горивото станала една од главните теми што ги загрижуваат руските граѓани.
