УНЕСКО соопшти дека Националниот парк Скадарско Езеро во Црна Гора е прогласен за еден од 14-те нови резервати на биосферата во светот.
Во соопштението на УНЕСКО се наведува дека овие подрачја претставуваат живи примери за тоа како луѓето и природата можат да напредуваат заедно преку заштита на биолошката разновидност, поддршка на одржливиот развој и зајакнување на локалните заедници.
„Оваа година носи и неколку значајни пресвртници. Три држави ги добија своите први резервати на биосферата – Црна Гора, Тимор-Лесте и Аруба, при што целата територија на Аруба е прогласена за резерват на биосферата“, се наведува во соопштението.
Од Министерството за екологија, одржлив развој и развој на северот на Црна Гора оценија дека впишувањето на сливот на Скадарското Езеро во мрежата на резервати на биосферата претставува историски момент за државата.
„Ова е историски момент за Црна Гора и уште една силна потврда дека богатството на нашата природа е препознаено и ценето на највисоко меѓународно ниво“, соопшти Министерството преку објава на Фејсбук.
