Седум лица загинаа, а 44 се повредени во комбиниран руски напад со ракети и дронови врз главниот град на Украина, Киев.
Државната служба за вонредни состојби на Украина соопшти дека 20 лица се водат како исчезнати.
Како што пренесува „Украинска правда“, меѓу загинатите е и 12-годишно девојче.
Во нападот се урнала деветкатна станбена зграда, при што загинале двајца мажи на возраст од 21 и 30 години, како и жена чиј идентитет сè уште се утврдува.
Еден човек загинал и при напад врз бензинска пумпа.
Градоначалникот на Киев, Виталиј Кличко, соопшти дека меѓу 44-те повредени има новороденче и едно дете.
Кличко наведе дека се урнал дел од станбена зграда со 18 станови во Дарницкиот округ во Киев.
Украинскиот министер за внатрешни работи, Игор Клименко, изјави дека во потрагата и спасувањето учествуваат шест тимови со кучиња.
Кличко информираше и дека поради нападот е прекинато водоснабдувањето во новиот дел на градот, на левиот брег на реката Днепар.
