Во Кавадарци успешно се одржаа вторите Мини Олимписки игри 2026, во организација на Олимпискиот комитет на Македонија, во рамки на ОВЕП програмата поддржана од Олимписка солидарност. На настанот учествуваа повеќе од 150 ученици од основните училишта од градот.
Учениците се натпреваруваа и учествуваа во шест спортски и едукативни активности, преку кои беа промовирани олимписките вредности како фер-плеј, почит, пријателство и тимска работа. Настанот помина во позитивна атмосфера, со силен спортски дух и голем ентузијазам кај учесниците.
Сите ученици добија маици, сертификати и медали за учество, додека најдобрите тројца беа наградени со трофеи.
Посебен придонес во организацијата дадоа десет наставници, кои работеа со учениците во подготовките и во совладувањето на олимпискиот едукативен материјал, со што значително придонесоа за успешно реализирање на настанот.
На манифестацијата присуствуваа наставници, директори на училиштата и претставници од секторот за образование при Општина Кавадарци. Од локалната самоуправа беше изразена подготвеност за продолжување на соработката со Олимпискиот комитет, со цел понатамошна промоција на спортот и олимписките вредности кај младите.
Во рамки на активностите беше донирана спортска опрема за две училишта, како и училишен инвентар и реквизити за идни спортско-едукативни активности.
Организаторите оценуваат дека Мини Олимписките игри претставуваат важна платформа за развој на спортската култура, социјализација и едукација на младите, како и за зајакнување на олимпискиот дух во образовниот процес.
