Градоначалничката на Скопје, Данела Арсовска, е избрана за претседател на Форумот на градоначалници што се одржа во Обединетите нации во Женева, Швајцарија, соопштија денеска од Град Скопје.
За потпретседатели на Арсовска се избрани градоначалникот на Брага во Португалија, Рикардо Рио, и градоначалничката Сузан Аткин на шкотскиот град Глазгов, Велика Британија.
„Годинава за првпат како официјално тело во рамки на Обединетите нации, исклучителна чест претставува фактот што Арсовска беше избрана како претседател и ја доби довербата преку директно гласање на Форумот во кој учествува по еден градоначалник од секоја држава од Паневропскиот регион, Северна Америка, Африка, Азија, Латинска Америка и Блискиот Исток“, се наведува во соопштението на Град Скопје.
Сепак, со ова, се чини, не се согласуваат сите во Градот Скопје, особено не претседателот на Советот на Градот, Трајко Славески.
Тој во објава на својот профил на социјалната мрежа „X“ (претходно Твитер) иронично го искоментира изборот на Арсовска за претседател на Форумот на градоначалници на ОН.
„Тој што не ја знае, скапо ја плаќа!“, напиша Славески на социјалната мрежа со линк до вест за градоначалничката Арсовска.
