На планината Елбрус во Русија се пронајдени телата на уште тројца планинари од Босна и Херцеговина, кои биле дел од седумчлена експедиција што побарала помош при симнување од планината, соопшти Истражниот комитет на Руската Федерација.
Според руските власти, местоположбата на телата е утврдена, но нивната евакуација засега не е можна поради исклучително лошите временски услови.
Групата од седум државјани на БиХ самостојно се искачувала на Елбрус, без професионален водич. Во саботата навечер побарале помош откако, на надморска височина од околу 5.100 метри, не можеле да го продолжат спуштањето.
Трагедијата ја преживеале двајца планинари. Едниот успеал сам да се спушти и да ги извести спасувачките служби, по што припадници на руското Министерство за вонредни состојби го пронашле и вториот преживеан.
Спасувачите претходно ги пронајдоа и телата на уште двајца членови на експедицијата, со што бројот на загинати достигна пет.
Истражниот комитет на Русија отвори истрага за несреќата и ги утврдува сите околности, вклучително и дали при искачувањето биле прекршени безбедносните правила. По наредба на претседателот на Истражниот комитет, Александар Бастрикин, ќе биде поведена и кривична постапка.
Во меѓувреме, планинари од Гацко, Билеќа и Требиње избегнале слична судбина бидејќи, поради неповолните временски услови, се откажале од искачувањето на највисокиот врв во Европа.
Елбрус, висок 5.642 метри, е изгаснат вулкан и највисокиот планински врв во Русија и Европа. Планината е позната по своите непредвидливи временски услови и важи за една од најопасните дестинации за високогорско планинарење.
