Со 558 гласа „за“, 70 „против“ и 59 воздржани Европскиот Парламент ја усвои резолуцијата на известувачот за Северна Македонија, Илхан Ќучук.
Извештајот ги поздравува напорите на Северна Македонија во реформите за членство во ЕУ и ги охрабрува Скопје и Софија да изнајдат заемно прифатливо решение за спорот поради кој Северна Македонија не може да ги почне преговорите со ЕУ и покрај исполнетите реформи.
-Се надевам дека Северна Македонија и Бугарија ќе продолжат со дијалогот за нерешените билатерални прашања за да постигнат одржлив резултат. Постигнување компромис за акциски план со конкретни мерки, чија имплементација би се проценувала редовно согласно Договорот за пријателство, би го рестартирало процесот и би му овозможило на Советот да ја свика првата меѓувладина конференција што е можно поскоро, изјави Ќучук.
Амандманот поднесен од страна на социјалдемократите и зелените, преку кој се осудуваше провокативната реторика на Бугарија кон Северна Македонија, не помина поради блокада на европратениците од Европската народна партија и европските конзервативци.