Усвоен новиот Закон за оружје: Повеќе електронски услуги и поедноставени постапки

Министерството за внатрешни работи информира дека е усвоен новиот Закон за оружје, со кој се поедноставуваат постапките, се прошируваат роковите и се воведуваат нови електронски услуги за граѓаните.

Од МВР посочуваат дека законот претставува дел од реформската агенда на државата и има за цел да обезбеди поголема безбедност, побрзи административни услуги и поголема правна сигурност.

— реклама —

Со новиот закон, граѓаните ќе можат со едно барање да поднесат барање за повеќе парчиња оружје, а се воведува и ограничување на максималниот број парчиња оружје, со законски предвидени исклучоци.

Законот, исто така, ја регулира можноста за полнење муниција, воведува обврска за обезбедување соодветен простор за безбедно чување и сместување на оружјето, како и проширено сокорисничко право.

— реклама —

— реклама —

Дополнително, рокот за набавка на оружје по основа на наследно решение се продолжува од два на четири месеци.

Од МВР информираат дека е предвиден и рок од една година од примената на законот за сите лица кои пропуштиле да поднесат барање за набавка на оружје по основа на наследство или биле одбиени поради пропуштен рок, како и за легализација, пререгистрација или доброволно предавање на оружјето.

Со новото законско решение се воведуваат и нови електронски услуги, со цел поедноставување и забрзување на административните постапки.