Владата во изминатите 26–27 месеци инвестирала повеќе од 90 милиони евра во образовната инфраструктура, од кои половина директно преку Министерството за образование, изјави премиерот Христијан Мицкоски.
Тој посочи дека значаен дел од инвестициите се насочени и кон студентските и ученичките домови, каде што, како што рече, процесот на реконструкција и обновување веќе е започнат.
Мицкоски најави дека утре ќе биде пуштен во употреба реконструираниот студентски дом „Стив Наумов“, додека наскоро се очекува да биде завршен и студентскиот дом „Кузман“.
„Многу скоро ќе биде и вториот студентски дом „Кузман“, но исто така и сите студентски и ученички домови ќе бидат – и веќе е почнат процесот – на нивна реконструкција и обновување, нешто што со децении не било направено“, рече Мицкоски.
Премиерот информираше и дека дополнителни околу 45 милиони евра преку АА-програмата, односно преку проектот за децентрализирање средства од централниот буџет кон општините, се наменети за образовни проекти. Средствата ќе се користат за реконструкција на основни и средни училишта.
„Има многу работи што треба да се направат. Приоритет по приоритет, еден по еден, тие приоритети ги решаваме“, изјави Мицкоски.
Тој оцени дека инвестициите во образовната инфраструктура се значајни и претставуваат еден од приоритетите на Владата.
Мицкоски ги повика новинарите утре да присуствуваат на отворањето на реконструираниот студентски дом „Стив Наумов“ и да се запознаат со условите што ќе им бидат обезбедени на студентите.
