Државниот санитарен и здравствен инспекторат утврдил прекршување кај дежурниот здравствен работник од охридската болница во случајот со починатата стружанка од коронавирус, соопшти директорката на инспекторатот, Иринка Сотирова на денешната прес конференција.
Сотирова потенцираше дека вонреден инспекциски надзор кој почнал вчера сеуште трае.
– Инспекцискиот надзор се уште трае, но од досега добиените информации утврдено е прекршување во однос на неовозможување на здравствена заштита на пациент, се однесува на здравствен работник кој бил дежурен во времето кога пациентката е донесена на преглед. Точно е дека матичниот доктор има издадено упат. За сите други прашања ќе одговорам и ќе го информирам министерот во извештајот што ќе биде подготвен денеска затоа што се уште се земаат изјави од сите оние кои работеле тој или следниот ден на Инфективната болница во Охрид, истакна Сотирова.
По обелденувањето на овој случај, министерот за здравство Венко Филипче најави разрешување на директорката на Охридската болница, а предмет за овој случај отвори и Јавното обвинителство.
фото: Архива