Времето денеска претпладне ќе биде сончево со мала до умерена облачност, додека од пладневните часови се очекува локален развој на нестабилна облачност проследена со пороен дожд, грмежи, засилен ветер и услови за изолирана појава на град, информираат од Управата за хидрометеоролошки работи.
Според прогнозата, ќе дува слаб до умерен северен ветер, а дневната температура ќе се движи од 26 до 33 степени. Утринските температури ќе бидат во интервал од 9 до 18 степени.
Во Скопје времето ќе биде сончево со мала до умерена облачност, но во одделни делови од котлината попладне ќе има услови за нестабилност, проследена со краткотраен пороен дожд, грмежи и засилен ветер.
Минималната температура во главниот град ќе изнесува околу 15 степени, додека максималната ќе достигне до 32 степени.
Од УХМР апелираат граѓаните да бидат внимателни во попладневните часови поради можноста за локални временски непогоди.
