Вандализирани се 45 од вкупно 112 столбови поставени за зимска планинарска маркација на патеката Попова Шапка – Титов Врв, долга околу 11 километри, информираат од Здружението за одржлив развој „САТ“.
Од Здружението велат дека дел од опремата е уништен, оштетен или целосно отстранет, со што е предизвикана финансиска штета од најмалку 8.000 евра, односно околу 500.000 денари. Сепак, посочуваат дека последиците не се само материјални, туку можат да имаат директно влијание врз безбедноста на планинарите.
Зимската маркација била поставувана од ноември 2025 година до крајот на јули 2026 година, со ангажман на повеќе од 25 волонтери и мали бизниси од Тетово и Боговиње. Тие во тешки планински услови учествувале во транспортот, подготовката и поставувањето на опремата.
Од „САТ“ објаснуваат дека во зимски услови, кога снегот, маглата, силниот ветер и намалената видливост ја покриваат или целосно ја прават невидлива летната маркација, поставените зимски столбови се особено важни за ориентација и следење на безбедната траса.
Столбовите се означени со црвена и жолта боја за да обезбедат поголем визуелен контраст на снежниот терен. Од Здружението предупредуваат дека нивното отстранување може да значи губење на важни точки за ориентација во услови кога планинскиот терен станува тешко препознатлив.
Од „САТ“ нагласуваат дека планинарската маркација е дел од туристичката инфраструктура и има значење за развојот на планинскиот и активниот туризам. Според нив, ваквите вандалски постапки се спротивни на заложбите Шар Планина да се развива како безбедна и привлечна дестинација за планинари и туристи, но и како можност за економски развој на локалните заедници.
Случајот е пријавен во Полициската станица „Попова Шапка“, а на 19 август на терен бил извршен увид од полициски службеници и претставници на Националниот парк „Шар Планина“.
Од Здружението очекуваат надлежните институции да ги утврдат околностите и да преземат соодветни мерки против сторителите. Воедно, апелираат до посетителите да ја чуваат планинарската инфраструктура и секое оштетување или отстранување на маркацијата да го пријават кај надлежните институции.
