Доколку забележите дека вашето куче често ги лиже или гризе шепите додека одмора, не претпоставувајте веднаш дека станува збор само за вообичаено чистење по прошетка. Според ветеринарите, ваквото однесување најчесто укажува на одреден здравствен проблем и не треба да се игнорира.
Ветеринарот д-р Амир Анвари предупредува дека постојаното лижење и гризење на шепите речиси секогаш има медицинска причина.
„Најверојатно постои медицински проблем поради кој кучето го прави тоа и затоа треба да биде прегледано од ветеринар. Најчестите причини можат успешно да се третираат, но важно е сопствениците да реагираат навреме, бидејќи кучето очигледно чувствува непријатност“, објаснува тој.
Како најчеста причина ги посочува алергиите, кои можат да бидат предизвикани од храна или од фактори во околината. За разлика од луѓето, кај кучињата алергиите најчесто се манифестираат преку кожата, предизвикувајќи силен јадеж.
Друг можен причинител се паразитите, како болви, крлежи и грини, кои исто така можат да предизвикаат интензивно чешање. Лижењето може да биде и знак на болка, особено кај постари кучиња со артритис, кои често ја лижат областа околу болниот зглоб.
Сепак, причините не мора секогаш да бидат медицински. Според д-р Анвари, стресот и анксиозноста можат да доведат до вакво однесување, а во одредени случаи тоа може да прерасне и во опсесивно-компулсивна навика.
Од британската организација за заштита на животните, ПДСА, додаваат дека досадата и фрустрацијата исто така можат да бидат причина. Затоа се препорачува кучињата да имаат доволно физичка активност, интерактивни играчки и ментална стимулација.
Ветеринарите апелираат до сопствениците да не го занемаруваат овој знак, бидејќи упорното лижење на шепите не е нормално однесување и најчесто е показател дека на кучето му е потребна помош.
