Дваесет и деветгодишен велосипедист од Тетово се здобил со тешки телесни повреди во сообраќајна несреќа што се случила на локалниот пат меѓу селата Нераште и Радуша, информираат од Министерството за внатрешни работи.
Според информациите, несреќата се случила на 6 јуни околу 15:30 часот, кога патничко возило „Фолксваген туран“ со тетовски регистарски ознаки удрило во велосипедистот А.М. (29) од Тетово.
По несреќата, возачот со автомобилот го пренел повредениот во приватна амбуланта во Нераште, а потоа го напуштил местото. Подоцна, велосипедистот со друго возило бил пренесен во Клиничката болница во Тетово, каде што лекарите констатирале тешки телесни повреди.
Увид на местото извршила екипа од Полициската станица за безбедност на патниот сообраќај Тетово. За време на увидот, на местото пристигнал Л.М. (39) од Нераште со возилото „Фолксваген туран“ и се пријавил како учесник во сообраќајната несреќа.
Од МВР велат дека се преземаат мерки за целосно расчистување и документирање на случајот.
