„Венко Заев поради страв, Апасиев за повеќе пари, СДС и Левица го блокираат Изборниот законик на штета на дијаспората и реформите“, вели Манасиевски

На денешната прес-конференција, портпаролот на ВМРО-ДПМНЕ, Валентин Манасиевски, обвини дека СДС и Левица го блокираат донесувањето на новиот Изборен законик, кој, според него, ги содржи препораките на ОБСЕ и ОДИХР, како и предлозите што со месеци биле усогласувани на работните средби.

— реклама —

Манасиевски изјави дека СДС се спротивставува на предлогот македонската дијаспора да може да гласа по електронски пат или по пошта.

— реклама —

„Како ВМРО-ДПМНЕ предложивме дијаспората да гласа по електронски пат или по пошта. Овој предлог беше одбиен од страна на СДС затоа што, според нас, стравуваат дека граѓаните кои ја напуштија државата во периодот на нивното владеење нема да ги поддржат нивните политики“, рече Манасиевски.

Осврнувајќи се на Левица, тој посочи дека и покрај тоа што, како што рече, нивните предлози за финансирање на изборните кампањи биле прифатени, партијата не го поддржува договорот што бил подготвуван со месеци.

— реклама —

Според Манасиевски, ваквата блокада го доведува во прашање исполнувањето на реформските обврски на државата, додавајќи дека и Европската Унија повикала на политички консензус и навремено донесување на Изборниот законик.

— реклама —

Од ВМРО-ДПМНЕ порачаа дека остануваат на ставот оти Изборниот законик треба да биде усвоен со широк политички консензус, во интерес на државата, реформите и овозможувањето на македонската дијаспора да го оствари своето право на глас по електронски пат.