Вештачката интелигенција ќе ја зголеми потрошувачката на струја во германските центри за податоци

Потрошувачката на електрична енергија во центрите за податоци во Германија значително ќе се зголеми во наредните години, пред сè поради забрзаниот развој на вештачката интелигенција, проценува индустриското здружение „Битком“.

— реклама —

Според истражувањето на здружението, центрите за податоци и помалите информатички постројки во Германија годинава ќе потрошат околу 23 терават-часови електрична енергија, што одговара на годишната потрошувачка на околу 6,5 милиони домаќинства.

— реклама —

До 2030 година потрошувачката би можела да достигне од 35 до 38 терават-часови, а до 2035 година да порасне на 56 до 70 терават-часови.

Од „Битком“ предупредуваат дека недоволниот капацитет на електроенергетската мрежа и долгите постапки за добивање дозволи може да го забават развојот на Германија во центар на дигиталната индустрија. Претседателот на здружението, Ралф Винтергерст, истакнал дека земјите што ќе заостанат со изградбата на инфраструктурата брзо ќе ја изгубат предноста и во развојот на вештачката интелигенција.

— реклама —

Здружението бара намалување на трошоците за електрична енергија и забрзување на постапките за планирање. Според Килијан Вагнер, одговорен за одржлива дигитална инфраструктура во „Битком“, недостигот од центри за податоци нема да ја запре дигиталната трансформација, туку ќе ја зголеми зависноста на Германија од странство, бидејќи компаниите ќе ја градат потребната инфраструктура во други земји.

— реклама —

Во истражувањето е опфатена и потрошувачката на вода. Според податоците на „Битком“, две третини од центрите за податоци во Германија трошат најмногу еден децилитар вода за секој киловат-час електрична енергија. Системи за ладење со испарување, кои трошат најмногу вода, се користат во приближно една третина од центрите.