Наглиот раст на цените на мемориските чипови и зголемената побарувачка од секторот за вештачка интелигенција создаваат сериозни проблеми за индустријата за видеоигри, предупредија јапонските гиганти Nintendo и Sony.
Компаниите посочуваат дека бумот на дата-центрите за AI дополнително ја ограничува понудата на полупроводници и ги нарушува глобалните синџири на снабдување. Цените на меморијата во првиот квартал годинава се удвоија, а аналитичарите очекуваат дополнителен раст до 63 проценти во тековниот квартал.
Nintendo соопшти дека повисоките трошоци за компоненти, особено за меморија, како и влијанието на царините, ќе ги зголемат трошоците на компанијата за околу 100 милијарди јени во тековната фискална година. Претседателот на компанијата, Шунтаро Фурукава, изјави дека растот на трошоците и курсните разлики влијаеле врз одлуката за поскапување на новата конзола Switch 2.
Новата цена на Switch 2 во Јапонија ќе биде повисока за 10.000 јени и ќе изнесува 59.980 јени, додека во САД конзолата ќе чини 499,99 долари, што е за 50 долари повеќе од првично планираното.
Компанијата е под притисок да го забрза излегувањето на клучните видеоигри со цел да ја поттикне продажбата на конзолата. Аналитичарот Серкан Тото предупредува дека Nintendo е особено ранлив бидејќи Switch 2 сè уште е во рана фаза на продажба, а корисниците се чувствителни на цените.
Nintendo очекува продажба од 16,5 милиони примероци од Switch 2 во текот на годината, што е помалку од 19,9 милиони продадени конзоли претходната година.
Во меѓувреме, Sony уште во март ја зголеми цената на PlayStation 5 во САД за 100 долари, на 649,99 долари. Компанијата соопшти дека обезбедила доволно мемориски чипови за оваа година, но очекува високите цени да продолжат и во 2027 година.
Sony проценува дека продажбата на PS5 во голема мера ќе зависи од тоа колку мемориски чипови ќе може да набави по „разумни“ цени. Компанијата очекува дополнителен финансиски поттик и од излегувањето на видеоиграта Grand Theft Auto VI, закажано за ноември, што би можело дополнително да ја зголеми продажбата и активноста на корисниците.
