Тројца членови на раководството на ЈП „Комуналец“ – Гостивар се приведени во денешната координирана полициска акција поврзана со загадувањето на водата за пиење во градот, дознава „Скопје1“.
Според нашите информации, по итна постапка се приведени вршителката на должност директор Артана Асани, раководителот на Одделението за водовод Вадедин Дервиши и техничкиот директор Леон Нуредини.
Акцијата ја спроведуваат надлежните институции во координација со Основното јавно обвинителство. Според сознанијата на „Скопје1“, предметот во оваа фаза се води поради сомнение за сторени кривични дела „Загадување на вода за пиење“ и „Тешки дела против животната средина и природата“ од Кривичниот законик.
Според неофицијални информации до кои дојдовме, извештајот на Институтот за јавно здравје покажал дека од четирите анализирани мостри од водата, во две е утврдено присуство на фекални колиформни бактерии, додека во еден примерок било регистрирано и зголемено количество хлор.
Надлежните институции засега не ги потврдуваат официјално приведувањата, ниту соопштуваат детали за текот на акцијата. Се очекува во текот на денот Министерството за внатрешни работи и Основното јавно обвинителство да излезат со официјални информации за преземените мерки и за понатамошниот тек на постапката.
