(Видео) „Балканскиот криминален октопод се руши, по Вучиќ и Орбан следен ќе биде Мицкоски“, вели Филипче

Претседателот на СДСМ, Венко Филипче, оцени дека политичките промени во регионот означуваат слабеење на, како што го нарече, „балканскиот криминален октопод“, додавајќи дека по Александар Вучиќ и Виктор Орбан, следен ќе биде Христијан Мицкоски.

— реклама —

На денешната прес-конференција, Филипче рече дека промените во Унгарија и Србија се најава за крај на политичките, бизнис- и медиумските врски за кои тврди дека ги одржуваат коруптивните режими во регионот.

Тој ја обвини власта на Мицкоски дека го следи моделот на Српската напредна странка, а Вучиќ го посочи како политички ментор на македонскиот премиер. Според Филипче, ваквите поврзаности придонесуваат за, како што рече, заробена држава, медиумски мрак и корупција.

— реклама —

Лидерот на СДСМ ги спомена и бизнис-интересите во енергетиката, трговијата со електрична енергија и финансискиот сектор, посочувајќи ги компанијата „Руднап“, министерката Сања Божиновска, Душан Адамовиќ и влезот на „Алта банка“. Тој изнесе и обвинувања за поврзаност на лица од српската власт со наркобизнисот и за нивни релации со компании во Македонија блиски до премиерот.

— реклама —

Филипче упати критики и кон медиумите „Ало“ и „Еуроњуз“, тврдејќи дека во Македонија работат без соодветна регистрација и дека служат за ширење пропаганда и дискредитирање на политичките противници. Тој рече дека бил лично мета на, како што ги оцени, лажни и дискредитирачки објави, додавајќи дека одговорните еден ден ќе сносат одговорност.

Според Филипче, промените во регионот покажуваат дека на политичките и бизнис-врски врз кои се темелат овие модели постепено им доаѓа крајот.