Филмот во кој Бред Пит повторно ќе се појави во улогата на Клиф Бут од остварувањето на Квентин Тарантино „Беше еднаш во Холивуд“ конечно го доби и официјалниот наслов.
На стриминг-платформата Нетфликс беше објавено дека продолжението, кое го режира Дејвид Финчер, официјално ќе се вика „The Further Mis-Adventures of Cliff Booth“.
Филмот од 25 ноември ќе се прикажува две недели во IMAX кината ширум светот, пред на 23 декември да стане достапен за стриминг.
Квентин Тарантино го напиша сценариото за новиот филм, а Бред Пит повторно ја толкува улогата на каскадерот Клиф Бут. Дејството е сместено во 1977 година, осум години по настаните од првиот филм, и го следи Бут додека се соочува со целосно поинаков Холивуд.
Тарантино претходно објасни дека одлучил да не го режира продолжението бидејќи не сакал неговиот следен режисерски проект – за кој планира да биде и негов последен – да биде продолжение на некој негов претходен филм.
„Го сакам ова сценарио, но повторно одам по пат по кој веќе сум поминал. Тоа едноставно не ме воодушевуваше особено“, изјави тој минатата година во подкастот „Church of Tarantino“.
„Беше еднаш во Холивуд“ постигна голем комерцијален успех, заработувајќи 377 милиони долари ширум светот и освојувајќи два Оскари од вкупно 10 номинации. Меѓу нив беше и првиот актерски Оскар на Бред Пит.
Според информациите што светските медиуми ги објавија во април годинава, славниот актер за новиот филм би требало да добие неверојатни 40 милиони долари, сума која го опфаќа неговиот актерски хонорар и продукцијата.
Доколку оваа информација се покаже како точна, тоа би бил најголемиот хонорар во кариерата на Бред Пит.
За споредба, за улогата на Сони Хејс во филмот „F1“ наводно добил 30 милиони долари.
