Француската прва дама Брижит Макрон повторно се вклучи во хуманитарна акција, но овојпат на навистина невообичаен начин.
Во рамки на долгогодишната кампања „Pièces Jaunes“, која собира средства за деца на болничко лекување, на настан одржан во Дизниленд во близина на Париз, Брижит Макрон накратко ја презеде улогата на диџеј.
На дружењето, кое се одржа во опуштена атмосфера, присуствуваа околу 300 деца, а меѓу гостите беше и селекторот на француската фудбалска репрезентација Дидие Дешан, кои имаа можност да се запознаат и дружат со познатите личности.
Во еден момент, на изненадување на сите присутни, Брижит Макрон застана зад DJ-пултот и ја крена атмосферата пуштајќи ја песната „Forever Young“ од групата Alphaville. Снимките од нејзиниот танц и добро расположение брзо се проширија на социјалните мрежи и беа пречекани со воодушевување.
Хуманитарната кампања „Pièces Jaunes“ трае до 7 февруари, а собраните средства се наменети за подобрување на условите и квалитетот на животот на децата и адолесцентите кои се лекуваат во болници.
