Дадилка среде игротеката „Дежа ву“ во скопски аеродром утрово брутално претепала дете на околу две годишна возраст. Настанот во МВР го пријавил сопственик на угостителски објект. Имено тој околу 11:00 часот при проверка на безбедносните камери на угостителскиот објект, забележал како НН женско лице во игротеката физички малтретира дете.
Жената дошла во игротеката на кафулето со три дечиња, веројатно братчиња, а на видео снимката, објавена на фан страницата на „Дежа ву“ на „Фејсбук“, се гледа како во еден момент жената со влечење седнува едно од дечињата во скут, брутално му ја затвара устата со рака за да не плаче, па го врти и му удира шлаканици, по што грубо го седнува спроти неа. На безбедносните камери се гледа како истата жена го удира детето и од столиците и од подот.
По пријавата полицијата утврди дека станува збор за негователка која била ангажирана да го чува детето.
Лицето е приведено и известен е јавен обвинител за натамошна постапка.
