(Видео) „Дали власта давала инструкции јавни пари да се насочуваат кон Алта банка?“: Битиќи до Кочоска

Пратеникот на СДСМ, Фатмир Битиќи, на денешната надзорна расправа за АЛТА банка упати прашања до министерката за финансии Гордана Димитриеска-Кочоска, барајќи одговори за улогата на Владата во процесот на преземање на Стопанска банка Битола и располагањето со акциите на јавните институции.

Битиќи оцени дека случајот отвора сериозни прашања за институционалната одговорност, можните пропусти и заштитата на јавниот интерес. Тој се повика и на извештајот на Европската комисија, тврдејќи дека Владата не презема доволно мерки за справување со корупцијата.

— реклама —

Според хронологијата што ја презентираше пратеникот, на 1 септември 2025 година Народната банка дала согласност АЛТА банка да ја преземе Стопанска банка Битола, а на 23 септември Владата донела три заклучоци поврзани со понудата за откуп на акции од 16 јавни институции.

Битиќи посочи дека со првиот заклучок било предвидено разгледување на понудата, додека со вториот, доколку нема законски пречки, институциите требало да достават писмена изјава за нејзино прифаќање најдоцна до 10 октомври 2025 година.

— реклама —

Тој нагласи дека овие информации, според него, се содржани во владин записник и ја доведе во прашање изјавата на министерката дека не била консултирана за влезот на АЛТА банка.

— реклама —

Дополнително, Битиќи посочи дека шест јавни претпријатија од Битола пријавиле 13,4 милиони денари во банката, по што побара од министерката да одговори колку акции продале 16-те институции, по која цена и врз основа на каква проценка била донесена одлуката.

Тој праша и зошто во постапката не било вклучено Државното правобранителство, туку надлежноста му била доверена на Генералниот секретаријат на Владата.

— реклама —

На крајот, Битиќи побара одговор дали некој од политичките кабинети давал инструкции или препораки јавните средства да се насочуваат кон АЛТА банка.