Неколку деца се повредени откако дрвен мост се урнал под нив додека биле на излет во селото Виженка, соопшти украинската Државна служба за вонредни ситуации.
На снимката, објавена од надлежните служби, се гледа како мостот ненадејно се руши додека група деца ја преминува реката, по што тие паѓаат во водата.
Според првичните информации, неколку деца се здобиле со повреди и биле пренесени во болница, каде им била укажана медицинска помош. Засега не се соопштува точниот број на повредени ниту тежината на нивните повреди.
Надлежните институции соопштија дека дрвената конструкција не можела да ја издржи тежината на групата што во моментот се наоѓала на мостот.
Во тек е истрага, која треба да ги утврди сите околности што довеле до инцидентот.
