Неколкумина од демонстрантите во првите редови се издвоија пред топата и фрлија јајца кон зградата на Обвинителството, на протестот поради кражбата на лекови на Клиниката за Онкологија.
Демонстрантите пред Обвинителството извикуваа „Нема правда, нема мир“, „Оставка“, „Убијци“, а претходно со црвен спреј напишаа „Соучесници“.
Оставија и отпечатоци од црвени дланки, алудирајќи на „крвави раце“.
На транспарентите беа испишани пораки: „Колку вреди човечкиот живот“, „Убијци“, „Монструми“, „Убивате за профит“, „Сите ќе си лежите“.
Денешниот протест почна пред Владата, каде со црвена боја демонстрантите напишаа „Убијци“, а говореа и неколку лица кои од рак загубиле блиски од своето семејство, упатувајќи го гневот кон македонското здравство.
Иако во најавата на организаторите стоеше дека демонстрантите ќе протестираат пред Владата и Министерството за здравство, сепак собирот од владината зграда заврши пред Обвинителството.
Закажан е нов протест за следната недела, во исто време.
Народот излезе на улиците по објавата дека на пациентите на Клиниката за онкологија им биле давани физиолошки раствори, а скапите лекови против канцерогинете заболувања завршувале на црниот пазар. Случајот е во рацете на Обвинителството.
Макфакс
