По неколкунеделна борба за живот и напорна рехабилитација, пристигнаа добри вести за штркот Виктор, кој здружението „Animal Voice“ го спаси во тешка здравствена состојба откако бил пронајден паднат од гнездо.
Од здружението информираат дека Виктор успешно се опоравил и деновиве повторно почнал да лета. Иако сега е слободен и без здравствени проблеми, тој сè уште се враќа на местото каде што престојувал во изминатите недели.
Приказната за Виктор претходно стигнала до стотици илјади луѓе, а од „Animal Voice“ сега велат дека пред него е важна одлука – дали ќе биде подготвен да замине на долгото патување или ќе остане во Македонија во текот на зимата.
Според здружението, доколку Виктор одлучи да замине, неговата здравствена состојба му овозможува да го продолжи патувањето. Доколку, пак, процени дека не е подготвен за долгото патување, од „Animal Voice“ велат дека ќе му обезбедат соодветно живеалиште каде што ќе може безбедно да ја помине зимата.
„По лошите, ви носиме добри вести“, порачаа од здружението, споделувајќи ја веста за напредокот на штркот.
