(Видео) Долги редици низ Србија за поддршка на студентската листа „Студентите победуваат“

Долги редици граѓани утрово се формираа во повеќе градови низ Србија за да дадат потпис за поддршка на студентската изборна листа „Студентите победуваат“, која треба да учествува на претстојните парламентарни избори, закажани за 25 октомври.

Во Нови Сад граѓаните почнале да се собираат уште пред отворањето на пунктовите за собирање потписи. Според извештаите од терен, дел од нив пристигнале околу половина час порано, а по почетокот на собирањето биле формирани долги колони.

View this post on Instagram

— реклама —

Слични сцени се забележани и во Чачак, каде што граѓани чекале на тротоарите за да стигнат на ред за потпис. Редици имало и во Лозница и Шабац, а потписи се собираат и во Богатиќ.

Во Шабац голем интерес имало и претходниот ден, кога дел од граѓаните, според локалните извештаи, чекале меѓу два и три часа за да ја дадат својата поддршка.

— реклама —

Голем одѕив е забележан и во Белград. Долга колона била снимена во Пожешка улица на Баново Брдо, каде што редици имало и претходниот ден, а граѓани чекале за потпис и во Симина улица.

И во Крагуевац утрово се формирале редици пред местата определени за собирање потписи.

Според кандидатот на студентската листа, драматургот Жељко Хубач, листата треба да биде предадена до Републичката изборна комисија во понеделник попладне.

— реклама —

„Тогаш ќе ја имаме комплетната студентска листа на увид. Таа во суштина е составена од луѓе кои се реализирани во своите професии, има многу универзитетски професори, многу луѓе кои имаат знаење за сите сфери на општеството и можат да придонесат за надминување на многуте проблеми што ги имаме“, изјави Хубач.

Тој се осврна и на тврдењето на српскиот претседател Александар Вучиќ дека листата на Српската напредна странка за три часа собрала 170.000 потписи.

Хубач го оспори таквиот број, споредувајќи го со претходното собирање потписи организирано од студентите и оценувајќи дека наведената динамика на заверување е „апсолутно невозможна“. Тој, сепак, нагласи дека нема проблем со бројот на потписи што го пријавила СНС, туку со тоа дали толкав број реално можел да биде заверен во наведениот период.

Собирањето поддршка за студентската листа продолжува, а нејзиниот целосен состав се очекува да биде познат по предавањето на кандидатурата до Републичката изборна комисија.