(Видео) Драматични сцени од Хрватска: Силниот ветер го разгоре пожарот на Брач

Силниот ветер повторно го разгоре големиот пожар на хрватскиот остров Брач и придонесе огнот да се прошири кон нови подрачја. Од заливот Маслинова пристигнуваат драматични снимки на кои се гледа како густ чад се шири над теренот, а поради опасноста биле евакуирани луѓето од рибникот „Сардина“.

Над огнената стихија се формирал и пирокумулус – голем облак кој настанува поради силното загревање на воздухот над пожарот.

— реклама —

Пожарот избувна во четвртокот доцна навечер меѓу Ложишќа и Грабовица на Брач, а пожарникарите се обидуваат да го задржат неговото ширење кон пустиножителскиот манастир Блаца и населбата Милна. Во гаснењето се вклучени и авиони „Канадер“.

Командантот на оперативната противпожарна зона на Брач, Никола Мартиниќ Драган, изјави дека состојбата е подобра во споредба со текот на ноќта. Според него, пожарникарите успеале да одбранат неколку објекти кои биле во опасност, додека главниот фокус бил ставен на заштитата на манастирот Блаца и Милна.

— реклама —

— реклама —

„Го потиснуваме пожарот кон морето, а на теренот моментално има околу сто пожарникари“, изјави Мартиниќ Драган за Хрватското радио.

Од оперативниот центар за гаснење пожари претходно соопштија дека на теренот биле ангажирани 136 пожарникари со 36 возила. Тие успеале да го запрат напредувањето на огнот кон Грабовица и се прегрупирале за да го спречат неговото ширење кон Блаца и Милна.

— реклама —

Засега нема опасност за куќите и станбените објекти, а надлежните соопштија дека нема потреба од евакуација на населението.

Според првичните проценки, огнот зафатил околу 3.000 хектари шума и ниска вегетација. Поради размерите на пожарот, главниот пожарникарски командант, Славко Туцаковиќ, нареди дополнителни сили од Дубровник и Шибеник, како и засилувања од противпожарните здруженија од Задарската и Шибенско-книнската жупанија.