Украинските сили во изминатите две недели извршија серија напади со дронови врз логистичката инфраструктура на „Вајлдберис“, најголемата руска платформа за интернет-трговија, позната и како „рускиот Амазон“. Според независниот руски портал „Агентство“, погодени се 12 од 15-те најголеми складишта на компанијата, а седум од нив сè уште не ја обновиле работата.
Проценките покажуваат дека компанијата изгубила најмалку 15 проценти од своите складишни капацитети, додека штетата на инфраструктурата се проценува на околу 650 милиони евра. Дополнителни загуби од повеќе од 3 милијарди евра би можеле да претрпат продавачите чии производи биле складирани во оштетените логистички центри.
Украинскиот претседател Володимир Зеленски претходно изјави дека погодените логистички центри учествуваат во снабдувањето на руската војска со компоненти за дронови, навигациска опрема и друга воена техника. Кремљ ги отфрли овие тврдења, но украинските власти наведуваат дека прекинувањето на логистичките канали е само една од целите на нападите.
Советникот на украинскиот претседател Михајло Подољак изјави дека нападите имаат и економска цел – да се нанесе удар врз компанија чиј промет надминува 67 милијарди евра годишно и врз банките што ја финансираат. Според него, тоа би можело да изврши дополнителен притисок врз рускиот државен буџет и да предизвика незадоволство кај деловната заедница.
„Вајлдберис“ е најголемата платформа за е-трговија во Русија со околу 45 проценти удел на пазарот, додека нејзиниот главен конкурент „Озон“ има околу 32 проценти. По воведувањето на западните санкции, двете компании значително го зголемија својот обем на работа преку т.н. паралелен увоз.
Според анализите, големите логистички центри на „Вајлдберис“ претставуваат лесна цел за напади со дронови, а компанијата истовремено се соочува и со високо задолжување. Ројтерс објави дека косопственичката Татјана Ким побарала помош од руската влада, која засега соопштува дека ја следи ситуацијата, но сè уште нема донесено конкретна одлука.
