Новак Ѓоковиќ приреди еден од најинтересните и најсимпатичните моменти на досегашниот Вимблдон за време на убедливата победа над Стефанос Циципас во второто коло.
Во текот на мечот, додека собирачката на топчиња со ножички ја отстрануваше црната лента од неговото десно рамо, по претходна негова молба, српскиот тенисер ненадејно одглуми дека чувствува силна болка.
Девојката видливо се исплаши, мислејќи дека случајно го повредила Ѓоковиќ пред преполните трибини и милионската телевизиска публика, па веднаш се повлече чекор назад.
Неколку секунди подоцна, Ѓоковиќ се насмеа, а кога сфати дека станува збор за шега, насмевката не ја сокри ниту собирачката на топчиња. Сцената предизвика позитивни реакции кај публиката.
По натпреварот, Ѓоковиќ објасни дека сакал малку да се опушти за време на мечот.
„Такви работи правите кога водите со 2:0 во сетови, а не кога губите со 0:2. Жал ми е ако ја исплашив. Тоа малку ме опушти на теренот. Само се забавував“, изјави српскиот тенисер.
Во третото коло на Вимблдон, Ѓоковиќ ќе се соочи со Французинот Артур Риндеркнеш, кој во претходната рунда го совлада Американецот Мартин Дам Јуниор со 6:4, 7:6 (7:1) и 6:3.
