Изложби, перформанси, инсталации, концерти, театарски претстави и филмски проекции во Скопје. Со куп настани синоќа се одржа 19. традиционална културна манифестација „Бела ноќ 2023“. Дел од публиката би искоментирала: „Најдобра до сега“.
Најголемиот спектакл беше кај „Порта Македонија“ која блескаше како никогаш досега. Под неа, сцена, на која настапија Андријана Јаневска, Наде Талевска, Дани Димитровска и Ламбе Алабаковски, придружувани од Биг бенд оркестарот, под диригентската палка на Љупчо Мирковски. Најфасцинантно за сите беше специјално визуелно шоу со 3Д-мапирање на портата, за време на настапите.
Во ГТЦ, пак, можеше да се види изложбата „Игри и мечтаења“ на Друштвото на ликовните уметници, а на Факултетот за драмски уметности да се проследат повеќе театарски претстави, како и филмска и музичка програма. На плоштадот „Филип Втори“ повеќе културно-уметнички друштва изведоа традиционални македонски ора.
Во Кинотеката на Македонија можеа да се проследат македонски филмски и музички достигнувања, а во галеријата „Остен“ изложбата „Право на јавни простори“ од Факултетот за архитектура и дизајн на Универзитет „Американ колеџ“. Во Капан ан беше прикажан проектот „Никеја“ со Славе Димитров и Весна Ѓиновска-Илкова, а во Домот на културата „Кочо Рацин“ изложбата „Култура во кутија“ на културното јадро „Доминиум“.
Настанот е во организација на ЈУ „Универзална сала“, финансиран од Град Скопје, а е дел од богатата културна понуда на Град Скопје како Европска престолнина на културата 2028.
