Претседателот на СДСМ, Венко Филипче, од собраниската говорница упати низа критики кон премиерот Христијан Мицкоски, оценувајќи дека Владата не реализирала ниту едно од клучните ветувања дадени пред граѓаните пред изборите.
За време на седницата за пратенички прашања, Филипче посочи дека ВМРО-ДПМНЕ пред доаѓањето на власт ветувала подобар животен стандард, економски раст, повисоки плати, повеќе инвестиции, правда и напредок кон Европската Унија, но дека по две години од мандатот резултатите изостанале.
„Помина половина од мандатот, а граѓаните не добија подобар живот, повисок стандард, функционални институции, правда ниту европска перспектива“, рече Филипче.
Лидерот на СДСМ оцени дека наместо ветените промени, граѓаните се соочуваат со повисоки трошоци за живот, економска неизвесност и зголемено задолжување на државата.
Тој истакна дека животниот стандард е намален, сиромаштијата е зголемена, а минималната плата од 600 евра, која била најавувана, не е реализирана.
Филипче се осврна и на економските показатели, посочувајќи дека инфлацијата е значително повисока од ветеното ниво, додека јавниот долг, според него, достигнал речиси 11 милијарди евра.
„За две години државата е задолжена со дополнителни 2,5 милијарди евра, а граѓаните не гледаат конкретни придобивки од тие средства“, нагласи тој.
Во своето обраќање, Филипче рече дека не се исполнети ниту ветувањата за зголемување на странските инвестиции, поддршката за стопанството и навремен поврат на ДДВ кон компаниите.
Тој оцени дека и земјоделците останале без очекуваната поддршка, посочувајќи дека субвенциите се намалени, а исплатите доцнат.
Осврнувајќи се на младите, Филипче рече дека Владата не понудила конкретни политики за нивно задржување во земјата, поради што, според него, сè поголем број млади размислуваат за иселување.
Во делот на реформите и евроинтеграциите, претседателот на СДСМ оцени дека земјата е во застој и дека недостигаат суштински реформи.
На крајот од своето излагање, Филипче му постави директно прашање на премиерот Мицкоски, барајќи од него да преземе одговорност за, како што рече, „двете изгубени години“ и за неисполнетите ветувања пред граѓаните.
