Претседателот на СДСМ, Венко Филипче, на седницата на Националниот совет за евроинтеграции оцени дека намерното запирање на европскиот пат на Македонија претставува форма на државен удар и предупреди дека државата сè повеќе заостанува зад останатите земји кандидати за членство во Европската Унија.
Филипче истакна дека евроинтеграцијата отсекогаш била стратешка определба на Македонија и потсети на клучните моменти од процесот, почнувајќи од независноста, преку решавањето на спорот со Грција, членството во НАТО и добивањето кандидатски статус, до актуелните предизвици на патот кон ЕУ.
Тој оцени дека последните извештаи на Европската комисија се сериозно предупредување за состојбите во државата, посочувајќи дека во нив се нотирани проблеми со владеењето на правото, независноста на судството, борбата против корупцијата, притисоците врз медиумите и, како што рече, зголеменото влијание на „српскиот свет“ и Русија во регионот.
Според Филипче, Владата јавно се залага за европска интеграција, но во пракса не ги презема неопходните чекори за продолжување на преговорите. Тој нагласи дека веќе се покажало дека Преспанскиот договор не ги загрозил македонскиот идентитет и јазик, туку, како што рече, тие биле потврдени, а членството во НАТО донело значајни придобивки за државата.
Тој потенцираше дека нема алтернатива на членството во Европската Унија и посочи дека пристапниот процес овозможува реформи, подобро функционирање на институциите и пристап до значителни европски фондови. Како примери ги наведе Хрватска, Бугарија, Романија, Италија и Шпанија, кои, според него, значително напредувале благодарение на европските средства и реформите.
Филипче предупреди дека Македонија е единствената земја кандидат која сè уште нема отворено ниту едно преговарачко поглавје, додека Албанија, Црна Гора, Молдавија и Украина веќе бележат напредок во процесот на пристапување.
Во своето обраќање тој постави прашање и до евроамбасадорот Михалис Рока, барајќи појаснување какви би биле последиците доколку државата остане во сегашната состојба на застој и дали Македонија ќе може да смета на средства од следната седумгодишна финансиска рамка на Европската Унија доколку не покаже конкретен напредок во евроинтегративниот процес.
