Претседателот на СДСМ, Венко Филипче, денеска на прес-конференцијата во Гостивар изјави дека партијата е на терен за да им помогне на граѓаните погодени од актуелната состојба, оценувајќи дека институциите не одговориле соодветно на кризата.
Филипче изјави дека случувањата во Гостивар се последица на, како што рече, неодговорното управување на Владата и институционалниот хаос.
„Очигледно е дека со оваа власт на Христијан Мицкоски и неговата организирана криминална група повеќе не станува збор за политичка или морална одговорност, туку за елементарни човекови права, како што се правото на здравје, здрава вода и здрава животна средина“, изјави Филипче.
Тој нагласи дека посетата на Гостивар нема цел да ја политизира состојбата, туку да обезбеди конкретна поддршка за граѓаните на кои, според него, им е најпотребна.
„Посетивме повеќе социјално загрозени семејства, постари лица и пензионери и им доставивме пакети со помош. Тоа ќе продолжиме да го правиме и во наредните денови“, рече Филипче.
Претседателот на СДСМ додаде дека граѓаните не смеат да бидат оставени сами во услови на здравствена криза и оцени дека институциите имаат обврска да работат во нивен интерес, наместо, како што рече, да ја прикриваат сопствената неодговорност.
Тој уште еднаш ја критикуваше Владата, наведувајќи дека, според него, граѓаните се принудени сами да се справуваат со последиците од актуелната состојба.
