Земјоделците од струмичкиот регион се соочуваат со сериозни проблеми, а државата не им обезбедува доволна поддршка, оцени претседателот на СДСМ, Венко Филипче, при денешната посета на Босилово и средбата со локалните производители.
Според него, состојбата е слична во сите земјоделски гранки и региони низ државата, при што земјоделците се жалат на неисплатени субвенции и ниски откупни цени.
„Како и во изминатиот период, така и денес слушаме исти поплаки од луѓето што произведуваат раноградинарски култури, јачмен, зелка и цвекло. Сите се соочени со исти проблеми – нема исплата на субвенции, а откупните цени се екстремно ниски“, изјави Филипче.
Тој ја обвини Владата за, како што рече, целосна негрижа кон земјоделскиот сектор, посочувајќи дека вкупниот износ на субвенции е намален, а средствата од ИПАРД-програмите на Европската Унија се изгубени.
„Наместо поддршка за луѓето кои ја хранат државата и можат да го зајакнат земјоделството, денес сме сведоци на изумирање на целиот сектор. Земјоделците се соочуваат со огромни трошоци и ниски откупни цени, поради што сè потешко можат да опстанат“, рече Филипче.
Во својата изјава тој се осврна и на одбележувањето на роденденот на ВМРО-ДПМНЕ во Струмица, оценувајќи дека партискиот слоган „Македонија забрзува“ не ја отсликува реалната состојба во државата.
„Може да им го честитам роденденот со констатацијата дека Македонија со нив забрзува единствено кон пропаст“, порача лидерот на СДСМ.
