Претседателот на СДСМ, Венко Филипче, од партискиот конгрес упати остри критики кон Владата, обвинувајќи ја дека неуспесите ги прикрива со националистичка реторика и дека ја држи државата во застој на патот кон Европската Унија.
Според него, власта „сака да изгледа голема на фотографија, а секојдневно станува мала пред проблемите што граѓаните ги чувствуваат“.
„Особена опасност е кога таа слабост се прикрива со националистичка реторика. Најлесно е неуспехот да се прикрие со врева. Најлесно е тешката реалност да се оттурне со наметнато чувство дека секоја критика е предавство, дека секој разумен предлог е слабост и дека секој повик за храбра одлука е понижување. Но држава не се води со инает. Држава се води со визија. Држава не се брани со изговори, туку со резултати“, рече Филипче.
Осврнувајќи се на Самитот ЕУ – Западен Балкан во Тиват, тој оцени дека европските лидери испратиле јасна порака дека проширувањето останува приоритет, додека Македонија заостанува зад соседите.
„Додека ние стоиме во место, Албанија веќе ги отвори сите кластери, а договорот за членство на Црна Гора веќе се пишува во Брисел. Историјата не нè чека. Околу нас тргнаа процеси што можат да ја променат политичката карта на Европа, а ние не смееме повторно да останеме во чекалната“, изјави лидерот на СДСМ.
Тој ја обвини Владата дека сака „Европа како сцена, но не и Европа како обврска“.
„Сака да седи на маса со Макрон и Мерц, но не сака дома да ја каже вистината за чекорот што мора да се направи. Наместо тоа, ги плаши граѓаните со наводно губење на идентитетот и јазикот. Тоа не е стратегија. Тоа е политичко купување време на сметка на иднината на државата“, порача Филипче.
На крајот тој постави прашање за одговорноста доколку земјата остане надвор од европските процеси.
„Македонија сака да знае кој ќе одговара ако останеме во чекалната“, рече Филипче.
