Претседателот на СДСМ, Венко Филипче, на денешната прес-конференција оцени дека здравствениот систем во државата се соочува со сериозни проблеми и ја обвини Владата дека не ја исполнува својата основна обврска – заштитата на здравјето на граѓаните.
Филипче изјави дека случајот со загадената вода во Гостивар, според него, не е изолиран инцидент, туку показател за, како што рече, системска нефункционалност на институциите.
Тој наведе дека здравството се соочува со недостиг на лекови, одложување на терапии, долги листи на чекање, нефункционални операциони сали, недостиг на медицински кадар и несоодветно управување со јавните здравствени установи.
„Основната функција на здравствениот систем – да го штити здравјето на граѓаните – е сериозно нарушена. Пациентите со месеци чекаат хируршки интервенции поради недостиг од кадар и инфраструктурни капацитети, а дел од операционите сали во повеќе јавни здравствени установи не функционираат“, изјави Филипче.
Тој додаде дека наместо инвестиции во подобрување на здравствените услуги, актуелната власт, според него, се фокусира на промотивни активности. Воедно истакна дека за време на владата на СДСМ биле зголемени платите и примањата на здравствените работници.
Филипче ја критикуваше и работата на Фондот за здравствено осигурување, тврдејќи дека со институцијата раководи лице без соодветно искуство во областа на здравството.
На крајот, претседателот на СДСМ побара политичка одговорност од надлежните, оценувајќи дека состојбата во здравствениот систем е сериозна и директно влијае врз здравјето на граѓаните.
